Videonan riba YouTube awo lo baha pa standard definition como default. Esaki ta pa tur usuario mundialmente y ta un stap abou for di high definition cual usuarionan normalmente ta uza. Esaki ta pa alivia e peso riba e red y infrastructura di internet cu e “lockdown” y otro polisanan cu ta lagando miyones di hende na cas. E cambio global a cuminsa awe y ta ser spera cu lo dura aproximadamente 30 dia. Usuario tin e posibilidad si di manualmente aumenta e calidad pa cada video individual.
Netflix ya caba a hasi esaki pa Europa cu sigun nan lo baha e trafico riba nan red cu 25%. Streaming di video ta un di e fuentenan cu mayor infuencia riba internet, hunto cu bahamento di weganan. Si nos consumidornan na Aruba ripara esaki, no yama Setar pues ta algo cu ta bin for di Netflix y YouTube mes.