Haci promocion ta un actividad cardinal den benta di producto of servicio. Promocion ta encera e publicacion di actividadnan comercial cu e intencion pa aumenta benta di producto of servicio.
Esaki ta un di e actividadnan esencial di un bon economia. Un bon economia ta genera produccion di producto, alocacion di inversionnan y distribucion di actividadnan economico cu ta genera mas actividadnan economico. Den e actividad di promocion, e negoshi ta purba di diferente forma pa bende aspectonan clave di e producto di un manera atractivo pa e consumido. Un bon strategia di promocion por aumenta benta di producto y un mal strategia of falta di promocion por desminui benta di producto.
Aunke haci promocion ta asina importante pa stimula benta, toch e no ta liber di riesgo. Riesgonan grandi na momento di haci promocion ta cu e informacion cu e negoshi ta purba di hiba pa e consumido keda mal interpreta. Pa e motibonan aki entre otro ley a pone regla pa e actividad di promocion, pasobra e consumido tin menos conocimiento di e producto y por lo tanto ta e partido mas debil y mas vulnerabel na posibel engañonan. Promocion engañoso ta trata e reglanan aki.
Promocion engañoso ta aparece den nos Codigo Civil, Buki 6, titulo 3 bao articulonan 194 te cu 196. Promocion engañoso ta considera ilegal si e negoshi of bendedonan di e negoshi haci notificacionnan publico of laga haci publico, e siguiente aspectonan di e producto of servicio:
- Naturalesa, composicon, cantidad, capacidad, caracteristanan of posibilidadnan di uso;
- Origen, forma of momento di fabricacion;
- E tamaño di e provision (voorraad);
- E prijs of e forma di calcula esaki;
- Rason of proposito di e oferta;
- Premionan otorga, certificado of otro valoracionnan di terceronan, of declacracionnan haci, terminonan usa scientifico of tecnico, conclusionnan tecnico of estadistica;
- Condicionnan bao cual productonan of servicionan ta wordo entrega of compra a sosode;
- Cantidad, contenido of tempo di e garantia;
- Identidad, calidad, abilidad of cualificacion y door di ken, bao ken su mando of guia of cu ken su cooperacion e productonan a keda of ta wordo fabrica of bendi, of e servicionan ofreci;
- Comparacion cu otro producto of servicionan.
Ley ta bisa cu esun cu comete promocion engañoso mester para responsabel pa posibel daño cu e causa, pero ley ta sali di e punto di bista cu e acusado mes mester prueba cu e no a comete e acto di promocion engañoso riba cual ta acusele. Por ultimo, Hues por ordena esun culpabel di promocion engañoso pa rectifica y tambe di ki forma e tin di rectifica.
Esaki ta parti di un serie di guia cu nos di CAS ta publica tur siman.